[Staycation]Mandarin Oriental文華東方酒店_2日1夜_隨心寫

為慶祝男朋友生日，我們揀了在港島的文華東方酒店慶生。其實揀這間酒店，亦有另一個原因，就係因為有同事不斷推介該酒店既自助餐好好食，然後我哋就滿懷期待地去試下。

我哋在某網站(非官網)預訂了兩日一夜，海景房，包夜晚自助餐的Package，平日非假期$35XX。

我哋入住既房間在7樓，唔算高。

房間好大，但由於不太高層，海景都略為遜色。

 

我哋都好喜歡佢浴室既設計，特別係好滿意浴缸有啲深度，咁樣就算坐係度水位都可以浸過膊頭。但係，佢廁所既設計就有啲其怪，在房間裏零零舍舍有個小房間，打開原來係廁所黎（完全估佢唔到）。另外，廁所有小部份裝咗磨砂玻璃，如果廁所唔開燈，望入去都幾得人驚⋯⋯

來到我哋最期待既部分，自助餐。

不得不說，有啲失望，每一款海鮮都好咸，好似浸完咸水咁，我哋只係食咗一轉，就冇再攞。

生蠔係要另外嗌先有，因為我哋兩人都不太喜歡食，所以只叫了一轉。其他食物是正常的，不差，佢哋既甜品亦比較多款式，由其係朱古力，係比較出色的。

其後我哋上到房，有點令我哋疑惑既地方，就係我哋冇request過打掃房間，但有房務員在我哋外出期間入房打掃，這點令我哋有啲反感⋯⋯

另外，還有一件不太愉快的事，酒店送了一個small cake給我們，蛋糕是好食的，比自助餐的甜品蛋糕好食，但我哋remark咗晚上11點送上房間，點知我哋checkin之後不久蛋糕就送到房間，咁我哋就先放在房間待晚上才食，然之後到晚上11點，又有一個蛋糕送到房，因為之前有人自己入房打掃，我哋開了「請勿打擾」燈，到第二日門口留有紙卡，先知道有蛋糕未能送到房，打電話落去問，酒店表示佢哋同事搞錯了，我哋感覺佢哋欠缺溝通。

其實今次的酒店住宿體驗，是有點失望的，無論係食物還是服務，都令我哋覺得有點意外，始終都是一間較高級既酒店，所以我哋都十分期待今次嘅體驗，但經過短短既住宿，已經有咁多問題，我哋應該唔會再入住了⋯⋯